Pasal Pado Manyatokan Rajo-Rajo Di Kinari
Adopun maso dahulunyo – Kan iyo urang Kinari
Iyo Kubuang Tigo Baleh – Di Dalam Luak Tanah Data
Iyo Alam Minang kabau – Asa barasa dahulunyo
Dari Gunuang Marapi juo – Kurang aso saratuih niniak
Ampek puluah ampek dari Bukik Batu Bukik Batu Patah – Limo puluah limo dari Gunuang
Marapi – Pai ka Ranah Rantau Jauah
Ka ilia ka Sorolangun – Ka mudiak ka Batang Lolo
Sampai ka Tapian Puti Nan Barambai – Lalu ka Taluak Aia Nibuang
Iyo di Sirangkak nan Badangkang – Sampai ka Data Koto Ajun
Sampai ka Jajak Kabau Jalang – Sampai ka Bukik Paranginan
Sampai ka Palanggo Pangisiran – Taruih ka Batang Gumanti
Ditampuah Siarak Budi – Tibo di Durian
Ditakuak Rajo – Di Sialang Balantak basi
Siluluak Punai Mati – Abai di Ranah Pantai Caramin
Sampai pulo dang ka hulu – Di sinan lubuaknyo gadang
Mangko kambang biak urang nantun
Kambang bakurun-kurun – Mangko tahimpun pulo sambilan puluah sambilan niniak
Datang mamudiak-I Batang Hari – Baranam urang jadi tuonyo
Partamo Datuak Rajo Pituan – Kaduo Datuak Patiah Nan Sabatang
Katigo Datuak Tumangguang – Kaampek Datuak Juru Mudi
Kalimo Datuak Manangkerang – Kaanam Datuak Juaro Medan Labiah
Adopun di dalam toboh Datuak Rajo Pituan – Ado Datuak Rajo Gamuyang
Kaduo datuak Rajo Intan – Katigo Datuak Rajo Malano
Kaampek Datuak Nan Tigo Selo – Mangko sampai di Sungai Pagu
Dimudiaki juo Batang Hari – Sampai ka Ranah Sigumanti
Sampai pulo ka Talago Gadang – Baranti di sabuah taluak
Kudian banamo Taluak Kinari
Adopun nan Limo Puluah Limo Niniak – Datuak Tumangguang
Datuak Nan Tigo Selo – Kaduo pai ka Bayang ka Bungo Pasang
Mangisi Rantau Pasisia Barat – Lapeh ka lawik nan sadidiah
Adopun Nan Ampek Puluah Ampek – Pai ka subaliak gunuang.
Mandirikan inyo lai – Badiri Linjuang Sati Koto Tinggi
Lalu mandirikan pulo tampek karapatan – Tampek banamo Pardamaian
Mangko maliek like rang nan banyak – Bumi laweh sayuik mamandang
Mako timbua pikiran maso nantun – Batuka arak hanyo lai
Arak kapado nan baru – Malaco latiah tampek diam
Mangko banamo kampuang Batuka Arak – Kudian banamo Batu Karak
Mangko di bawah kampuang nantun – Dilaco latiah jan dirambah
Mangko banamo Parambahan – Manjadi kampuang tampek diam
Adopun nan turun bukik – Surang parampuan adiak dek Datuak Rajo Pituan
Banamo Tabur Urai – Basuo batang nan rindang
Mangko mambari isyarat parampuan itu – Malaco latiah kini hari
Kudian jadi Kinari – Tampek batenggek buruang nan badendang-badendang
Katiko Tabur Urai dang di sinan – Banamo buruang nantun
Buruang Kinari – Baitu tutur kato
Antah iyo antahpun tido – Tapulang juo pado nan pandai
Mangko dari Niniak nan Ampek Puluah Ampek – Duo Baleh Niniak kumbali arah ka Sigumanti
Duo niniak pai ka Bayang – Salapan niniak ka Rantau Kimpalan
Duo puluh duo niniak – Itu nan tingga di Linjuang Sati Koto Tinggi
Iyo jan Batu Karak jan Kinari – Itu nan juo di Pardamaian
Adopun maso kudian hari pado tampek Pardamaian – Katiko urang lah Islam manjadi tampek
Paradilan – Banamo kampuang Paradilan
Kudian manjadi Kampuang Dilam
Adopun daripado nantun – Ado sabuah bukik
Tampek batandang dang kasinan – Ado nan mamancang galanggang
Ado mamikek balam – Ado pulo nan baburu
Ado nan dari Solok – Dari Salayo dari Guguak jan Koto Baru
Badiri pulo Korong kampuang banamo Bukik Tandang – Lorong kapado urang Kinari
Mandirikan kampuang Galanggang Tinggi – Iyo dilingkuang Batang Kayu Kinari
Tapi dek Jauah tampek mandi – Pindahlah ka Sungai Liek
Lalu maneba hanyo lai – Kampuang kaciak jadi laweh
Taratak manjadi dusun – Dusun manjadi koto
Manjadi koto Kampuang Kinari – Adopun dari Pagaruyuang
Dek mintak urang nan basamo – Iyolah urang di Kinari
Datanglah Puti Tabur Urai – Turunan Tabur Uirai nan dahulu
Dari anaknyo nan di Tanah Sangiang
Jikoknyo Tabur Urai nan dahulu nantun – Iyo jan anak nan lain
Itu barangkek ka Kinari – Malaco latiah maso dulu
Mandapati batang kayu gadang – Tipak kapado Puti Tabur Urai
Iyo nan dari Pagaruyuang – Itulah Puti dari Caramin Taruih
Di Alam Jayo Tanah Sangiang – Bini dek Sangiang Rajo Indo Rajo Dewo
Adiak dek Sangiang Rani Indopuro – Nan banamo Puti Reno Lawik
Bini dek Dewang Cando Ramowano – Rajo di Alam Pagaruyuang
Mangko datang Puti Tabur Urai –Datangnyo jan junjuangan
Iyo jan Sangiang Rajo Indo Rajo Dewo – Datang basamo anak kanduang
Nan partamo Puti Pinang Masak – Nan kaduo Puti Andam Dewi
Nan katigo Puti Birah – Nan kaampek Puti Ameh Manah
Nan kalimo Puti Gadih – Nan kaanam Puti Lindok
Nan katujuah Puti Rinjani – Kan iyo rajo nantun rajo adia rajo disambah
Kasukoan urang di nagari – Baranak pulo di Kinari
Baranak baduo urang – Nan partamo Puti Kasumbo
Nan kaduo Puti Sari Puti
Ampun baribu dipuhunkan – Adopun Puti Pinang Masak
Mauleh kaum rajo usali – Manurunkan rajo-rajo Cupak
Puti Andam dewi – Mauleh kaum rajo di Salayo
Manurunkan rajo-rajo di Salayo – Puti Birah ka Sirukam
Mauleh kaum Datuak Tan Bagindo Rajo Nan Gadang – Manurunkan rajo-rajo di Sirukam,
Puti Ameh Manah – Ka Panyakalan – Manurunkan rajo-rajo di Panyakalan
Puti Gadih ka Muaro Paneh – Manurunkan sutan-sutan di Muaro Paneh
Takisah Puti Lindok dibao laki ka Singkarak – Tipak kapado Puti Rinjani
Dibao laki ka Batu Banyak – Jikoknyo Puti Kasumbo
Manjadi Rajo Puti Koto Anau, duduak basamo dang junjuangan – Iyolah Rajo Koto Anau
Banamo Tuanku Rajo Baromandeo – Bagala Datuak Bagindo Yang Dipartuan
Adopun Puti Kasumbo – Malahiakan anak laki-laki
Banamo juo Tuanku Rajo Baromandeo – Bagala Datuak Bagindo Yang Dipartuan
Rajo Nagari Koto Anau – Duduak sagandiang di singgasano
Iyo jan Puti Reno Bulian – Anak Rajo Dewang Dewano
Rajo Alam di Pagaruyuang – Iyo jan Puti Reno Rani Dewi
Nan banamo Dewi Ranggowani
Tipak kapado Rajo Dewang Dewano – Anak dek Rajo Pandan Salasiah Banang Raiwano
Jikoknyo Dewi Ranggowani – Anak Rajo Cando Ramowano
Tipak kapado anak nan bungsu – Banamo Puti Sari Puti
Nikah jan surang panghulu – Iyo panghulu di Kinari
Baranak barapo urang – Nan surang Rajo Nan Bagajabiang
Adopun Puti Sari Puti – Naiak nobat jadi Rajo
Junjuangan jadi Manti Rajo – Bagala Datuak Lelo Manjo
Mangko Puti Sari Puti – Diganti dek anak kanduang
Iyolah dek Rajo Nan Bagajabiang – Itulah Rajo di maso mampalaweh Korong kampuang
Malaco latiah rimbo rayo – Rimbo manjadi taratak
Taratak manjadi dusun – Dusun manjadi koto
Koto manjadi nagari – Tadiri Nagari Bayang
Adopun Rajo nantun – Diganti dek kamanakan, disabuik Rajo Nan Bakarando
Nan dimaso mudo juo tingga di Bayang – Adopun rajo nantun
Diganti pulo dek kamanakannyo – Disabuik Rajo Nan Tagok
Mangko baganti pulo rajo – Diganti dek kamanakannyo
Tasabuik Tuanku Nan Kanduang – Mangko baganti Rajo nantun
Diganti pulo dek kamankannyo – Iyolah Rajo nan Parang ka Bayang
Adopun Rajo nan Parang ka Bayang – Parang pulo ka Pasisia
Parang malawan Si Kumpani – Si Kumpani di Pulau Cingkuak
Nan mamakan masak mantah – Harato urang harato awak
Taranak urang taranak awak – Tanah urang Tanah awak
Beranglah Rajo Kinari – Diboa bintaro hulubalang
Dubalang babilang bilang – Parang malawan urang nantun
Adopun rajo nan parang – Diganti pulo dek kamanakannyo
Disabuik Rajo nan Bagak
Tanamo gagah jan barani – Mambao urang gagah-gagah
Parang barsosoh di Pasisia – Parang malawan Si Kumpani
Mangko baganti pulo Rajo nantun – Diganti dek kamanakan
Iyolah surang parampuan – Banamo Puti Suto Suri
Rajo nan lamo di singgasano – Mangko diganti dek anaknyo
Banamo Puti Tabur Urai – Rajo nan Adia Bijaksano
Rajo nan arif cadokio – Nikah jan surang panghulu
Baranak tigo urang – Nan partamo Puti Cinto Hati
Kaduo Puti Bari Hati –Katigo Puti Sampai Hati
Adopun Puri Bari Hati – Itulah nan manurunkan Datuak Rajo Mudo
Tuo Korong Malayu Mudiak – Jikoknyo Puti Sampai Hati
Manurunkan Datuak Sati – Urang Tuo Suku Malayu
Adopun Puti Cinto Hati manjadi rajo di Kinari – Dek lah tuo badan diri
Dipanggia anak kanduang – Sajak kaciak pai ka Bayang
Pulang manjadi Rajo – Itulah Rajo Gajabiang
Tipak kapado Rajo Kinari – Biriak-biriak tibo ka samak – Dari samak ka halaman
Tabang maraok ka Tanah Bato – Dari niniak turun ka mamak
Dari mamak ka kamanakan – Pusako lamo baitu juo
Mangko sajak turun tamurun – Adopun rajo di Kinari
Jikoknyo rajo laki-laki – Bagala Datuak Rajo Pituan
Gala pusako sajak dulu – Sajak mulo datang dang ka Kinari
Ikolah Tambo Partuanan – Salasilah dari Rajo-Rajo
Salah jangga antahnyo ado – Lupo jan ragu tabao runduang
Antah titiak nan lah hilang – Antah barih nan lah lupo
Antah siang tamalamkan – Antah patang tapagikan
Antah tampuak tatinggikan – Antah rantiang tatampuakkan
Antah pucuak tarurek’an – Antah urek tapucuak’an
Rila jan maaf dipintakan – Ampun baribu dipuhunka